No har elevane starta undervisning på oppdrettsanlegget, snart får dei ny båt

Det skriver Møre og Romsdal fylkeskommune på sin nettside.

Det var sist vinter at Møre og Romsdal fylkeskommune i samarbeid med Nekton fekk undervisningskonsesjon for inntil 780 tonn laks. På anlegget Solværet får elevane ved Kristiansund vgs. tilgang til fisk og topp moderne utstyr i opplæringa. Og snart får elevane ny båt, som dei kan nytte for å komme seg ut til oppdrettsanlegget. Nekton har bestilt fartøyet med planlagd levering i januar/februar neste år.

– Gull verdt for elevane

Rektor Marit Rovik Bjerkestrand ved Kristiansund vgs seier at undervisningskonsesjonen er gull verdt for opplæring og undervisning for alle elevar på naturbruk. 

– Spesielt på Vg2 akvakultur, fordi dei ikkje kan få meir praksisnær opplæring i så trygge rammar som no. Det er ein draum for alle som held på med yrkesfagleg opplæring å ha eit så tett samarbeid med eit slikt fagfelt. Og eit slikt fagfelt kan ikkje skolen skaffe seg sjølv, ein må ha ein samarbeidspartnar som har aktivitet innanfor oppdrett, seier Bjerkestrand.

– Har interessa for naturbruk og akvakultur auka etter at skolen fekk konsesjonen?

– Det er ein auka interesse for naturbruk generelt, men vi har drive for kort tid til å seie at det er på grunn av det. Men eg trur at det nok også er på grunn av det. 

– Eg antar at vi framover vil sjå at vår skole vil profittere på å ha dette samarbeidet, og at elevane ser kor bra det er. Eit godt svar får vi først om eit par år når dette har fått satt seg, seier rektoren.

Nyutvikla praksis

I dag deltar 12 elever frå andreåret på Kristiansund vgs. i ei nyutvikla praktisk opplæring for Vg2 akvakultur. Elevane er to dagar på skole og tre dagar ute på oppdrettsanlegg, der mesteparten av læringa skjer i båt og ute på matfisklokalitet. Målet er å gi elevane eit realistisk innblikk i arbeidslivet i havbruksnæringa, og samtidig ruste dei med praktisk erfaring i studieløpet.

– Elevane har gitt strålande tilbakemeldingar, og trekker spesielt fram det å lære frå dei erfarne og positive tilsette på lokalitet Solværet og Fjordprakken, seier Roger Osen, dagleg leiar og ansvarleg for undervisningskonsesjonen i Nekton.

– Etter dette året står dei framføre fleire spennande moglegheiter, anten som lærling røktar/driftsteknikar, lærling matros, eller studere vidare for generell studiekompetanse, seier Osen.

Det er Fiskeridirektoratet som gir løyve til undervisningskonsesjon.