Makrellstørje på over 300 kilo i merd
Ei makrellstørje på 330 kilo klarte å koma seg inn i ein laksemerd på Osland i Høyanger.
Det oppstod ei beredskapshending på Osland havbruk i Høyanger då det dukka opp ein ubunden gjest i laksemerden.
Makrellstørja vog 330 kilo, og var 282 centimeter lang.
Dagleg leiar i Osland Havbruk, Marte Hatlevik, seier dette er fyrste gong dette skjer i selskapet.
- Det vart oppdaga ved oppstart av fôring i dag tidleg. Det vart sett beredskapsgruppe med ein gong, og sendt ut vaktlag og servicebåt, seier Hatlevik til NRK.
Ho seier dei tek hendinga alvorleg, og at dei jobbar for å unngå rømming.
Makrellstørja vart fanga med orkastnot, og avliva av jeger.
